انا المهبولة الي ما هجيتش

انا فنانة ارتيست

الفلوس ما تهمنيش

انا نكتب لروحي

ندواوي بيها

روحي

انا

نكتب خاطر هديكا حياتي

تحبو علاه تاخدوها

ما هيش رخيصة

ماهيش

متاعكم حياتي

متاع الشجرة الي عايشة فيا

متاع الهم الي والكلي جواجي

متاع السحر الي تلمو الناس وعملوه في

متاع الشر اللي دار بي

متاع القهرة الي باتت معايا

متاع الدموع الي كالويدان محبتش تشيح

متاع اللوم الي لاموه علي

متاع شنوة وشنوة

زعما كي نقوللكم انت هي

انا الي كلاولي حقي

انا الي اغتصبو ارضي

انا الي لوثو بحري

انا

الي سمموا هوايا

وانا

الي قتلو نواري وغنايا

انا

الشجرة الي حبسوها في قفص

انا الغزالة الي رماوها للوحش

انا الي بكيت مالي تولدت

وحتي ببنادم ما حبني لوجه الله

انا الي نموت كل يبوم ونحيا كل يوم انا الي قلت تونبري بالكتيبة

وتو تولي الحكاية دوا لجروحي

ونلقي ماء يصفيلي روحي

سممتوني في الخر

قتلتو

في كل شيء

قتلتو الحب الي في

تمنيكتو علي

خاطرني مهبولة

انا المهبولة اللي نعرف نكتب شعر

انا المهبولة اللي نحب البشر

انا المهبولة الي تمنيكتو عليها

اقعدو بعقولاتكم ما حشتيش بيها

عقولاتكم المرمدة في التراب

الي طامعة بزوز فرنك

الي قاتلها الجوع

الي ميتة علي الفرنك

الي تستخصر كلمة حلوة في انسان

والي تبات تحكي في الاركان

مخاخكم العاقة ومخي المهبول

فما فرق 

انا نفهم

انا نتكالم

انا نقرا 

انا نغني

انا نتفنن في الشطيح

انا نعرف كيفاش نشيخ

موش بفلوس غيري

وموش بمزية حد

انا نمشي بهوايا 

نصوحب بهوايا

نعشق بفن

الرخص عندو ماليه

وانا اصلي شجرة ما تتقلعش

حتي وكان انتي تحاول

ما تنجمش